ഗാലക്സി എഫ്15 5ജി; വില 15,000ത്തിൽ താഴെ, ട്രിപ്പിൾ റിയർ ക്യാമറ, 6000എംഎഎച്ച് ബാറ്ററി തുടങ്ങി കിടിലം ഫീച്ചറുകൾ

ഇന്ത്യയിൽ ഏറ്റവും കൂടുതൽ ഉപയോക്താക്കൾ ഉള്ള സ്മാർട്ട് ഫോൺ നിർമ്മാതാക്കളാണ് സാംസങ്. ബഡ്ജറ്റ് ഫ്രണ്ട്ലി ഫോണുകൾ മുതൽ ​ഗാലക്സി എസ് 24 അൾട്ര പോലുള്ള പ്രീമിയം സ്മാർട്ട് ഫോണുകൾ സാംസങ് ഇന്ത്യയിൽ വിൽപനയ്ക്ക് എത്തിക്കുന്നുണ്ട്. സാംസങ്ങിന്റെ എല്ലാ സെ​ഗ്മെന്റിലുമുള്ള ഫോണുകൾക്ക് ഇന്ത്യയിൽ വലിയ ഡിമാന്റ് ആണ് ഉള്ളത്.

സാധാരണക്കാർ ഏറ്റവും കൂടുതലുള്ള വിപണിയാണ് ഇന്ത്യയുടേത്. ആയതിനാൽ തന്നെ സാംസങ്ങിന്റെ ബഡ്ജറ്റ് ഫ്രണ്ട്ലി, മിഡ് ബഡ്ജറ്റ് ഫോണുകളാണ് ഇന്ത്യയിൽ ഏറ്റവും കൂടുതൽ വിറ്റുപോകുന്നത്. ഈ സെ​ഗ്മെന്റിലേക്ക് പുതിയ രണ്ട് ഫോണുകൾ കൂടി പുറത്തിറക്കാൻ തയ്യാറാകുകയാണ് സാംസങ്. ​ഗാലക്സി എഫ് 15 5ജി, എം 14 5ജി എന്നീ രണ്ട് ഫോണുകളാണ് സാംസങ് ഇന്ത്യയിൽ അവതരിപ്പിക്കാൻ ഒരുങ്ങുന്ന പുതിയ ഫോണുകൾ.

​MOST READ: റിയൽമി 12, റിയൽമി 12 പ്ലസ് പ്രീ ബുക്കിങ് ആരംഭിച്ചു; ഫോണുകൾ മാർച്ച് 6ന് എത്തും, ഫീച്ചറുകൾ അറിയാം

മാർച്ച് നാലിന് ഈ ഫോണുകൾ സാംസങ് ഇന്ത്യയിൽ അവതരിപ്പിക്കും എന്നാണ് പുറത്ത് വരുന്ന റിപ്പോർട്ടുകൾ സൂചിപ്പിക്കുന്നത്. പ്രമുഖ ഇ കൊമേഴ്സ് വെബ്സൈറ്റായ ഫ്ലിപ്പ്കാർട്ട് വഴി ആയിരിക്കും ഈ ഫോണുകൾ ഓൺലൈൻ ആയി വാങ്ങാൻ സാധിക്കുക. ബഡ്ജറ്റ് ഫ്രണ്ട്ലി ഫോണുകൾ ആയിരിക്കുമെങ്കിലും സൂപ്പർ അമോലെഡ് സ്‌ക്രീൻ ഉണ്ടായിരിക്കും എന്ന് സാംസങ് ഔദ്യോ​ഗികമായി തന്നെ സ്ഥിരീകരിച്ചിട്ടുണ്ട്. അതേ സമയം ചില ചോർച്ചാ റിപ്പോർട്ടുകൾ വഴി ഫോണുകളുടെ വിലയും പുറത്ത് വന്നിട്ടുണ്ട്.

രാജ്യത്തെ പ്രമുഖ ടിപ്സ്റ്ററായ അഭിഷേക് യാദവ് ആണ് എക്സ് (ട്വിറ്റർ) വഴി ഈ വില വിവരങ്ങൾ പുറത്ത് വിട്ടിരിക്കുന്നത്. ഇത് അനുസരിച്ച് സാംസങ് ​ഗാലക്സി എഫ് 15 5ജിയുടെ 4 ജിബി റാം 128 ജിബി സ്റ്റോറേജ് വേരിയന്റിന് 13,499 രൂപ ആയിരിക്കും വില. ഇതിന് പുറമെ 6 ജിബി റാം 128 ജിബി സ്റ്റോറേജ് വേരിയന്റിലും ഈ ഫോൺ സാംസങ് പുറത്തിറക്കാൻ സാധ്യതയുണ്ട്.

MOST READ: OPPO F25 Pro 5G ഫസ്റ്റ് ഇംപ്രഷൻ: 25000 രൂപയിൽ താഴെ വിലയിലെ മസ്റ്റ് ​ബൈ സ്മാർട്ട്ഫോൺ!

ഇതിന്റെ വില 14,999 രൂപ ആയിരിക്കും. ചില ബാങ്കുകളുടെ കാർഡ് ഉപയോ​ഗിച്ചാൽ ഈ ഫോൺ വാങ്ങുമ്പോൾ 1500 രൂപ ഡിസ്കൗണ്ട് ലഭിക്കുമെന്നും ഇദ്ദേഹം അവകാശപ്പെടുന്നു. ​ഗാലക്സി എം 14 5ജിയുടെ വില പരിശോധിക്കുമ്പോൾ ആകട്ടെ ഫോണിന്റെ 4 ജിബി റാം 64 ജിബി സ്റ്റോറേജ് വേരിയന്റിന് വില ആയി വരുന്നത് 9,499 രൂപ ആയിരിക്കും 6 ജിബി റാം 128 ജിബി സ്റ്റോറേജ് വേരിയന്റിലും ഈ ഫോൺ പുറത്തിറങ്ങിയേക്കാം.

ഈ വേരിയന്റിന്റെ വില 12,499 രൂപ ആയിരിക്കുമെന്നും ഇദ്ദേഹം പ്രവചിക്കുന്നു. മുൻ‌പ് സൂചിപ്പിച്ചത് പോലെ ബാങ്ക് ഓഫറുകൾ ഈ ഫോണിനും ബാധകമായിരിക്കും എന്നും ഇദ്ദേഹം കൂട്ടിച്ചേർക്കുന്നു. മാർച്ച് 4 മുതൽ ഗാലക്സി എഫ് 15 5ജി ഫ്ലിപ്പാകാർട്ട് വഴി വിൽപനയ്ക്ക് എത്തും എന്ന് സാംസങ് തന്നെ അറിയിച്ചിട്ടുണ്ട്. ഫോണിന്റെ ചില സവിഷശേഷതകളും സാംസങ് പുറത്ത് വിട്ടിട്ടുണ്ട്. ഇവ എന്തെല്ലാമാണെന്ന് വിശദമായി പരിശോധിക്കാം.

ഒക്ടാ കോർ മീഡിയടെക് ഡൈമെൻസിറ്റി 6100+ ചിപ്‌സെറ്റാണ് ഗാലക്സി എഫ് 15 5ജിയ്ക്കായി സാംസങ് ഒരുക്കിയിരിക്കുന്നത്. ഫോണിന് ട്രിപ്പിൾ റിയർ ക്യാമറയും അവകാശപ്പെടാൻ സാധിക്കുന്നതാണ്. നേരത്തെ സൂചിപ്പിച്ചത് പോലെ സൂപ്പർ അമോലെഡ് സ്‌ക്രീനും ഈ ഫോണിനായി നിർമ്മാതാക്കൾ നൽകിയിരിക്കുന്നു. 6,000 എംഎഎച്ചിന്റെ കരുത്തുറ്റ ബാറ്ററിയും ഈ ഫോണിൽ സാംസങ് പായ്ക്ക് ചെയ്തിട്ടുണ്ട്. രണ്ട് ദിവസം വരെ ഫോണിന് ബാറ്ററി ലൈഫ് ലഭിക്കും എന്നാണ് സാംസങ് അവകാശപ്പെടുന്നത്.

നാല് വർഷത്തെ ആൻഡ്രോയിഡ് ഒഎസ് അപ്‌ഡേറ്റുകളും അഞ്ച് വർഷത്തെ സുരക്ഷാ അപ്‌ഡേറ്റുകളുമാണ് ഗാലക്സി എഫ് 15 5ജിയുടെ മറ്റൊരു സവിശേഷത. ഈ സെ​ഗ്മെന്റിൽ ഇത്രയും ഫീച്ചറുകളും സവിശേഷതകളും ലഭിക്കുന്ന മറ്റ് ഫോണുകൾ ലഭിക്കുക വളരെ പ്രയാസമാണെന്ന് പരിശോധിച്ചാൽ ഉപയോക്താക്കൾക്ക് മനസിലാകുന്നതാണ്. വെറും 13,499 രൂപയ്ക്ക് ഇത്രയും ഫീച്ചറുകൾ വാ​ഗ്ദാനം ചെയ്യുന്ന ഗാലക്സി എഫ് 15 5ജിയ്ക്ക് മികച്ച പ്രതികരണം ലഭിക്കുമെന്നാണ് സാംസങ് പ്രതീക്ഷിക്കുന്നത്.