എസ് 24 അൾട്രയ്ക്ക് പുറമെ മറ്റൊരു അൾട്രാ ഫോൺ കൂടി ഈ വർഷം സാംസങ് പുറത്തിറക്കും; ഫോൾഡബിൾ അൾട്രാ ഫോൺ

സാംസങ്ങ് ഫോണുകളുടെ പ്രശസ്തി വർധിപ്പിക്കാൻ സഹായിച്ച മോഡലുകളാണ് അൾട്രാ ഫോണുകൾ. പ്രത്യേകിച്ച് സാംസ​ങ് ​ഗാലക്സി എസ് 23 അൾട്ര, എസ് 24 അൾട്ര എന്നീ ഫോണുകൾ. പ്രീമിയം സെ​ഗ്മെന്റിൽ എത്തിയ ഈ ഫോണുകൾ ആപ്പിളിന്റെ ഐഫോണുകൾക്ക് വരെ വലിയ വെല്ലുവിളി ഉയർത്തിയിരുന്നു.

മികച്ച ക്യാമറാ ഫീച്ചറുകൾ ആണ് ആൾട്രാ ഫോണുകളെ മറ്റ് ഫോണുകളിൽ നിന്ന് വ്യത്യസ്തമാക്കുന്നത്. ഡിഎസ്എൽആർ ക്യാമറകൾക്ക് പോലും അവകാശപ്പെടാൻ സാധിക്കാത്ത തരത്തിലുള്ള സൂമിങ് കഴിവുകളും ഈ ഫോണുകൾക്കായി സാംസങ് നൽകിയിരിക്കുന്നു. പൊതുവെ എസ് സീരീസ് ഫോണുകളിലാണ് സാംസങ് അൾട്രാ മോഡലുകൾ പുറത്തിറക്കുന്നത്. ഈ സീരീസിൽ അവസാനമായി ഇറങ്ങിയ ഫോൺ ​ഗാലക്സി എസ് 24 അൾട്രയാണ്. ഈ വർഷം ജനുവരി മാസത്തിൽ ആയിരുന്നു സാംസങ് ഈ ഫോൺ അവതരിപ്പിച്ചത്.

MOST READ: ലോകത്തിലെ ആദ്യത്തെ 5.5ജി സ്മാർട്ട്ഫോൺ പുറത്തിറക്കി ഓപ്പോ; സാറ്റലൈറ്റ് സഹായത്താൽ കോളുകൾ വിളിക്കാം

അടുത്തതായി ഇറങ്ങാനുള്ള അൾട്ര മോഡൽ എന്നത് ​ഗാലക്സി എസ് 25 അൾട്രയാണ്. അടുത്ത വർഷമാണ് ഈ ഫോൺ സാംസങ് പുറത്തിറക്കു. എന്നാൽ ഇതിന് മുമ്പ് ഈ വർഷം തന്നെ മറ്റൊരു അൾട്രാ ഫോൺ പുറത്തിറക്കാനുള്ള തയ്യാറെടുപ്പിലാണ് സാംസങ് എന്നാണ് പുറത്ത് വരുന്ന ചില റിപ്പോർട്ടുകൾ സൂചിപ്പിക്കുന്നത്. സാംസങ്ങിന്റെ ഫോൾഡബിൾ സീരീസായ ഇസെഡ് സീരീസിലും പുതിയ അൾട്രാ ഫോണുകൾ പുറത്തിറക്കും എന്നാണ് അറിയാൻ സാധിക്കുന്നത്.

കഴിഞ്ഞ വർഷമാണ് സാംസങ് ​ഗാലക്സി ഇസെഡ് ഫോൾഡ് 5, ഫ്ലിപ് 5 എന്നിങ്ങനെ രണ്ട് ഫോൾഡിങ് ഫോണുകൾ പുറത്തിറക്കിയത്. ഈ ഫോണുകളുടെ പിൻ​ഗാമികളായി ​ഗാലക്സി ഇസെഡ് ഫോൾഡ് 6, ഫ്ലിപ് 6 എന്നിങ്ങനെ രണ്ട് ഫോണുകൾ ഈ വർഷം അവതരിപ്പിക്കുന്നതായിരിക്കും. ഈ ഫോണുകൾക്ക് ഒപ്പം ആയിരിക്കും പുതിയ അൾട്രാ ഫോണിനെ സാംസങ് അവതരിപ്പിക്കുക. എസ് 24 അൾട്രയ്ക്ക് നൽകിയ അതേ ക്യാമറ തന്നെയായിരിക്കും ഈ ഫോണിനും നൽകാൻ സാധ്യത.

MOST READ: വൺപ്ലസ് നോർഡ് സിഇ4 എത്തി; ഇനി മത്സരം കനക്കും, 25000 രൂപയ്ക്ക് താഴെ ലഭിക്കുന്ന മികച്ച ഫോണേത്?

200 മെഗാപിക്‌സൽ പ്രൈമറി സെൻസർ ആയിരുന്നു എസ് 24 അൾട്രയ്ക്കായി സാംസങ് നൽകിയിരുന്നത്. സീരീസിലെ ടോപ് എൻഡ് മോ‍ഡൽ എന്ന നിലയ്ക്ക് ആയിരിക്കും അൾട്രാ ഫോണിനെ സാംസങ് എത്തിക്കുക. ​ഗാലക്സി ഇസെഡ് ഫോൾഡ് 6 അൾട്ര എന്ന പേരിൽ ആയിരിക്കും ഈ ഫോൺ പുറത്തിറങ്ങാൻ സാധ്യത. 9 ടു 5 ​ഗൂ​ഗിൾ എന്ന മാധ്യമമാണ് ഈ വാർത്ത പുറത്ത് വിട്ടിരിക്കുന്നത്.

അതേ സമയം ഈ ഫോൺ ഒരു പക്ഷെ ദക്ഷിണ കൊറിയയിൽ മാത്രമെ സാംസങ് പുറത്തിറക്കു എന്നും സൂചന ലഭിക്കുന്നുണ്ട്. SM-F958N എന്ന മോഡൽ നമ്പർ ആണ് ഗാലക്സി ഇസെഡ് ഫോൾഡ് 6 അൾട്രയ്ക്ക് സാംസങ് നൽകിയിരിക്കുന്നത്. ഇത് ദക്ഷിണ കൊറിയൻ വേരിയന്റുകൾക്ക് നൽകുന്ന നമ്പറുകൾ‌ക്ക് സമാനാമാണ് എന്നാണ് റിപ്പോർട്ടുകൾ സൂചിപ്പിക്കുന്നത്. ഇന്ത്യ അടക്കമുള്ള വിപണികളിൽ ഈ ഫോൺ എത്തുമോ എന്ന കാര്യത്തിൽ നിലവിൽ വ്യക്തത വന്നിട്ടില്ല.

അതേ സമയം ഈ സീരീസിൽ ഒരു ഫാൻ എഡിഷൻ എന്നപോലെ ​ഗാലക്സി എസെഡ് ഫോൾഡ് 6 എഫ്ഇ എന്ന പേരിൽ വില കുറഞ്ഞ ഒരു ഫോൾഡബിൾ ഫോൺ സാംസങ് പുറത്തിറക്കാൻ പദ്ധതിയിടുന്നുണ്ട് എന്ന് നേരത്തെ ഒരു വാർത്ത പ്രത്യക്ഷപ്പെട്ടിരുന്നു. എന്നാൽ ഇക്കാര്യത്തിലും ഇതുവരെ വ്യക്തത ഒന്നും ലഭിച്ചിട്ടില്ല. ഫോൾഡ് 6 സീരീസ് ജൂലൈ മാസത്തിൽ ഇറങ്ങുമ്പോൾ ഇതിന്റെ എഫ്ഇ വേർഷൻ വർഷാവസാനം ഇറങ്ങും എന്നായിരുന്നു ഈ റിപ്പോർട്ട് സൂചിപ്പിച്ചിരുന്നത്.

​ഗാലക്സി എസെഡ് ഫോൾഡ് 6 ഫോണുകൾക്ക് ഒപ്പം തന്നെ സാംസങ് തങ്ങളുടെ സ്മാർട്ട് റിങ്ങും പുറത്തിറക്കും എന്നാണ് പ്രതീക്ഷിക്കുന്നത്. മിക്കവാറും ഈ വർഷം ജൂലൈയിൽ നടക്കുന്ന സാംസങ് ​ഗാലക്സി അൺപായ്ക്ക് ഇവന്റിൽ ആയിരിക്കും ഇവ പുറത്തിറക്കാനുള്ള സാധ്യത. ഈ വർഷം സാംസങ് നടത്തുന്ന പ്രധാനപ്പെട്ട രണ്ടാമത്തെ അൺപായ്ക്ക് ഇവന്റ് ആയിരിക്കും ഇത്. ആദ്യ അൺപായ്ക്ക് ഇവന്റ് ജനുവരി മാസത്തിൽ സാംസങ് നടത്തിയിരുന്നു.