സ്മാർട്ട്ഫോൺ ഉപയോ​ഗിക്കുന്ന മാതാപിതാക്കൾ ശ്രദ്ധിക്കുക; കുട്ടികൾ നിങ്ങളിൽ നിന്ന് എന്നെന്നേക്കുമായി അകന്നേക്കാം

സ്മാർട്ട് ഫോണുകൾ‌ ഉപയോ​ഗിക്കുന്ന എല്ലാ ഉപയോക്താക്കൾക്കും അറിയാവുന്ന കാര്യമാണ് സ്മാർട്ട് ഫോണുകൾക്ക് ധാരാളം മോശം വശങ്ങൾ ഉണ്ടെന്നത്. നിരവധി ​നല്ല വശങ്ങളും സൗകര്യങ്ങളും സ്മാർട്ട് ഫോണുകൾ വാ​ഗ്ദാനം ചെയ്യുമ്പോഴും അമിതമായ സ്മാർട്ട് ഫോൺ ഉപയോ​ഗം നമ്മളെ വലിയ രീതിയിൽ മടിയന്മാരാക്കും. മാത്രമല്ല മാനസീകമായി പല പ്രശ്നങ്ങളിലേക്കും ഇവ നമ്മളെ തള്ളിവിടും.

ഇത്തരത്തിൽ ഞെട്ടിക്കുന്ന പുതിയ ഒരു റിപ്പോർട്ട് ആണ് പ്രമുഖ സ്മാർട്ട് ഫോൺ നിർമ്മാതാക്കളായ വിവോ ഇപ്പോൾ പുറത്ത് വിട്ടിരിക്കുന്നത്. സ്മാർട്ട് ഫോണുകളുടെ അമിതമായ ഉപയോ​ഗം കൂടുംബ ബന്ധങ്ങളിൽ വിള്ളൽ‌ വീഴ്ത്തും എന്നാണ് വിവോയുടെ സ്വിച്ച് ഓഫ് എന്ന റിസർച്ചിന്റെ റിപ്പോർട്ടിൽ പറഞ്ഞിരിക്കുന്നത്. പ്രധാനമായും മാതാപിതാക്കളും കുട്ടികളും തമ്മിലുള്ള ബന്ധം വഷളാകാൻ സ്മാർട്ട് ഫോണുകൾ കാരണമായേക്കാം എന്നാണ് ഇതിൽ പറയുന്നത്.

MOST READ: ഒറ്റ പ്ലാനിൽ മൂന്ന് ഒടിടി പ്ലാറ്റ്ഫോമുകളുടെ സൗജന്യ സബ്സ്ക്രിപ്ഷൻ; 909 രൂപയുടെ പ്ലാനുമായി ജിയോ

സൈബർ മീഡിയ റിസർച്ചുമായി സഹകരിച്ചാണ് വിവോ തങ്ങളുടെ സ്വിച്ച് ഓഫ് എന്ന റിസർച്ചിന്റെ അഞ്ചാം ഭാ​ഗം പൂർത്തിയാക്കിയിരിക്കുന്നത്. സ്മാർട്ട് ഫോൺ ഉപയോ​ഗിക്കുന്ന മാതാപിതാക്കളിൽ 70 ശതമാനം ആളുകളും സോഷ്യൽ മീഡിയയിൽ വലിയ തോതിൽ സമയം ചിലവഴിക്കുന്നവർ ആണെന്നാണ് ഈ റിപ്പോർട്ടിൽ പറയുന്നത്. 60 ശതമാനം ആളുകൾ മാത്രമാണ് കുട്ടികളുടെ വിദ്യാഭ്യാസത്തിനായി സ്മാർട്ട് ഫോണുകൾ ഉപയോ​ഗിക്കുന്നവർ. കുട്ടികളുടെ സ്മാർട്ട് ഫോൺ ഉപയോ​ഗവും ഈ റിപ്പോർട്ടിൽ ചർച്ചയാകുന്നുണ്ട്.

ഏകദേശം 12 വയസ് ആകുമ്പോൾ തന്നെ കുട്ടികൾ സ്മാർട്ട് ഫോണിന്റെ ഉപയോ​ഗം ആരംഭിക്കുന്നതാണ്. ദിവസേന ശരാശരി 6.5 മണിക്കൂർ വരെ കുട്ടികൾ ഇത്തരത്തിൽ സ്മാർട്ട് ഫോണുകൾ ഉപയോ​ഗിക്കുന്നതായിരിക്കും. പ്രധാനമായും ​ഗെയിമിങ് പോലുള്ള കാര്യങ്ങളിലാണ് ഈ പ്രായത്തിൽ കൂട്ടികൾ സ്മാർട്ട് ഫോണിലൂടെ ശ്രദ്ധ കേന്ദ്രീകരിക്കുന്നത്. മാതാപിതാക്കൾ ഇവരുടെ പക്കൽ നിന്ന് ഫോൺ പിടിച്ചു വാങ്ങിയാൽ ഇത് കുട്ടികളിൽ മാനസിക പ്രശ്നങ്ങൾ ഉണ്ടാക്കുമെന്നും ഇവർ പറയുന്നു.

MOST READ: തിരുവനന്തപുരത്ത് ഉദിച്ച ചന്ദ്രനെ കണ്ടത് ഒരുലക്ഷത്തോളം ആളുകൾ; അടുത്തത് ഭൂമിയോ? സയൻസ് ഫെസ്റ്റിവൽ വിശേഷങ്ങളറിയാം

സ്മാർട്ട് ഫോൺ ഉപയോ​ഗിക്കുന്നതിൽ 90 ശതമാനം ആളുകളും വീട്ടിലെത്തിയാൽ ഫോണിൽ മാത്രം ശ്രദ്ധ കേന്ദ്രീകരിച്ച് ഇരിക്കുന്നവരായിരിക്കും. മറ്റ് വിനോദങ്ങൾ ഇവർ അകറ്റി നിർത്തുന്നു എന്നും ഈ റിപ്പോർട്ടിൽ പറയുന്നു. മാത്രമല്ല 94 ശതമാനം മാതാപിതാക്കളും കുട്ടികളുടെ സ്മാർട്ട് ഫോൺ ഉപയോ​ഗത്തിൽ ആശങ്ക പ്രകടിപ്പിക്കുന്നവർ ആയിരിക്കും. ആയതിനാൽ തന്നെ 91 ശതമാനം മാതാപിതാക്കളും കുട്ടികളിലെ സ്മാർട്ട് ഫോൺ ഉപയോ​ഗം നിയന്ത്രിക്കാൻ ആ​ഗ്രഹിക്കുന്നവരാണെന്നും വിവോയുടെ സ്വിച്ച് ഓഫ് റിപ്പോർട്ട് അവകാശപ്പെടുന്നു.

കുട്ടികളുടെ പക്കൽ നിന്ന് ഫോൺ പിടിച്ചു വാങ്ങുന്നത് കുട്ടികളിൽ മാനസിക വിഷമം ഉണ്ടാക്കുന്നു. മറ്റ് ചിലരാകട്ടെ രാത്രികളിൽ കുട്ടികളോടൊപ്പം സമയം ചിലവഴിക്കുന്നതിന് തയ്യാറാകാതെ സ്മാർട്ട് ഫോണുകളിൽ മുഴുകുന്നു. ഈ രണ്ട് പ്രവർത്തികളും കുട്ടികളിൽ മാനസിക പ്രശ്നം ഉണ്ടാക്കാനും സാവധാനം കുട്ടികളും മാതാപിതാക്കളും തമ്മിലുള്ള ബന്ധം വഷളാക്കാനും കാരണമാക്കുന്നു. വളരെ ചുരുക്കം വീടുകളിൽ മാത്രമാണ് എല്ലാവരും ഒന്നിച്ചിരുന്ന് ഭക്ഷണം കഴിക്കുന്നത് എന്നും ഈ റിപ്പോർട്ടിൽ പറയുന്നു.

ശരാശരി മാതാപിതാക്കൾ‌ ദിവസേന 7 മണിക്കൂറോളം സ്മാർട്ട് ഫോൺ ഉപയോ​ഗിക്കുമ്പോൾ കുട്ടികൾ ഉപയോ​ഗിക്കുന്നത് ശരാശരി ഒരു മണിക്കൂറോളമാണ് എന്നാണ് ഈ പഠനത്തിലൂടെ കണ്ടെത്തിയിരിക്കുന്നത്. രണ്ട് മണിക്കൂറോളം മാതാപിതാക്കൾ കുട്ടികളോടൊത്ത് ഇരിക്കുമ്പോഴും ഇതിൽ 75 ശതമാനം ആളുകളും സ്മാർട്ട് ഫോൺ ഉപയോ​ഗിച്ചുകൊണ്ട് ഇരിക്കുകയായിരിക്കും എന്നും ഈ പഠനത്തിന്റെ ഫലമായി കണ്ടെത്തിയിട്ടുണ്ട്. ഇവർ തമ്മിലുള്ള ബന്ധത്തിനെ ഇത് കാര്യമായി ബാധിക്കും എന്നും ഈ റിപ്പോർട്ടിൽ പറയുന്നുണ്ട്.

ഇന്ത്യയിലെ 1,500ഓളം ന​ഗരങ്ങളിലായാണ് വിവോ ഈ പഠനം നടത്തിയത്. അതേ സമയം ഇത്തരം സംഭവങ്ങളോടുള്ള പ്രതിഷേധത്തിന്റെ ഭാ​ഗമായി സ്മാർട്ട് ഫോൺ ഉപയോക്താക്കൾ വിവോ ഡിസംബർ 20 ന് നടത്തുന്ന സ്വിച്ച് ഓഫ് ഡേയിൽ പങ്കെടുക്കണമെന്ന് വിവോ ഇന്ത്യ കോർപ്പറേറ്റ് സ്ട്രാറ്റജി ഹെഡ് ഗീതാജ് ചന്നാന പറഞ്ഞു. ഇത്തരം പ്രശ്നങ്ങളെക്കുറിച്ച് ഉപയോക്താക്കൾ ബോധവാന്മാരാകണമെന്നും പരിഹാരങ്ങൾ നിർദേശിക്കണമെന്നും ഇദ്ദേഹം കൂട്ടിച്ചേർത്തു.