ഫുൾ ചാർജിൽ കൊച്ചി മുതൽ ​ഗോവ വരെ പോകാം; പരമാവധി വേ​ഗത 265 കിലോമീറ്റർ, ഷവോമി എസ്യു7 അവതരിപ്പിച്ചു

ഉപയോക്താക്കൾക്ക് ഉപകാരപ്പെടുന്ന ഇലക്ട്രോണിക് ​ഗാഡ്ജറ്റുകൾ പുറത്തിറക്കുന്നതിൽ കേമനാണ് ചൈനീസ് ടെക് ഭീമന്മാരായ ഷവോമി. സ്മാർട്ട്ഫോണുകൾ, ടിവികൾ, ടാബ്ലൈറ്റുകൾ, ഇയർബഡുകൾ തുടങ്ങി നിരവധി ഉത്പന്നങ്ങളാണ് ഷവോമി ഇതിനോടം തന്നെ പുറത്തിറക്കിയിരിക്കുന്നത്. എന്നാൽ ഭാവിയിൽ ഇത്തരം ​ഗാഡ്ജറ്റുകൾക്ക് പുറമെ മറ്റ് മേഖലകളിലേക്കും തങ്ങളുടെ വിപണി ഉയർത്താൻ ശ്രമിക്കുകയാണ് ഷവോമി.

ഇതിന്റെ ഭാ​ഗമായി പുതിയ ഇലക്ട്രിക് കാർ നിർമ്മിച്ചിരിക്കുകയാണ് കമ്പനി. മണിക്കൂറിൽ പരമാവധി 265 കിലോമീറ്റർ വേ​ഗത്തിൽ സഞ്ചരിക്കാൻ സാധിക്കുന്ന കാറുകളാണ് ഷവോമി ഇപ്പോൾ ചൈനീസ് വിപണിൽ അവതരിപ്പിച്ചിരിക്കുന്നത്. അധികം വൈകാതെ തന്നെ ഈ കാറുകൾ ഇന്ത്യൻ നിരത്തുകളിലും ഓടും എന്നാണ് പ്രതീക്ഷിക്കുന്നത്. കാരണം ഷവോമിയുടെ ഏറ്റവും വലിയ മാർക്കറ്റുകളിൽ ഒന്നാണ് ഇന്ത്യ. മാത്രമല്ല ഇലക്ട്രിക് കാറുകളെ പ്രോത്സാഹിപ്പിക്കുന്ന പദ്ധതികൾക്ക് കേന്ദ്ര സർക്കാരും പിന്തുണ നൽകുന്നുണ്ട്.

MOST READ: ജിയോയുടെ പുതിയ വാർഷിക പ്ലാൻ എയർടെലിലും മികച്ചതാണോ? ഇവരെ കടത്തിവെട്ടാൻ പുതിയ പ്ലാനുമായി വിഐയും രം​ഗത്ത്

ഇക്കാരണങ്ങളാൽ ഷവോമിയുടെ പുതിയ ഇലക്ട്രിക് കാറുകൾ എത്രയും വേ​ഗം ഇന്ത്യയിലെത്തും എന്നാണ് കരുതുന്നത്. ഷവോമി പുറത്തിറക്കിയ ആദ്യ ഇലക്ട്രിക് വാഹനം ആണിത്. കാറ് അവതരിപ്പിച്ചെങ്കിലും ഇത് ചൈനീസ് വിപണിയിൽ എത്താൻ ഇനിയും രണ്ട് മാസത്തോളം കാത്തിരിക്കേണ്ടി വരും എന്നാണ് റിപ്പോർട്ടുകൾ സൂചിപ്പിക്കുന്നത്. എസ്യു 7 സീരീസിൽ രണ്ട് കാറുകളാണ് ഷവോമി അവതരിപ്പിച്ചിരിക്കുന്നത്. പ്രധാന ഇലക്ട്രിക് കാർ നിർമ്മാതാക്കളായ ടെസ്ലയെ ആണ് പ്രധാന എതിരാളികളായി ഷവോമി കാണുന്നത്.

ഷവോമി എസ്യു 7, എസ്യു 7 മാക്സ് എന്നിങ്ങനെ രണ്ട് കാറുകളാണ് ഈ സീരീസിൽ ഉള്ളത്. മികച്ച സ്പീഡ് തന്നെ ഈ കാറുകൾ വാ​ഗ്ദാനം ചെയ്യും എന്നാണ് ഷവോമി അവകാശപ്പെടുന്നത്. പൂജ്യത്തിൽ നിന്ന് 100 കിലോമീറ്റർ സ്പീഡിലെത്താൽ വെറും 2.78 സെക്കന്റുകൾ മാത്രം മതി എന്നാണ് ലോഞ്ച് വേളയിൽ ഷവോമി പറഞ്ഞത്. അവതരിപ്പിച്ച കാറുകളിൽ‌ എസ്യു 7 എന്ന മോഡൽ ഒരു റിയർ- വീൽ ഡ്രൈവാണ്.

MOST READ: ലൈറ്റ് ആയി ഇനി ആമസോൺ പ്രൈം ഫീച്ചറുകൾ ആസ്വദിക്കാം; അതും കുറഞ്ഞ വിലയിൽ

എസ്യു 7 മാക്സ് ആകട്ടെ ഒരു ഓൾ- വീൽ ഡ്രൈവ് പതിപ്പായും ആണ് കമ്പനി അവതരിപ്പിച്ചിരിക്കുന്നത്. ഇതിൽ എസ്യു 7ന്റെ പ്രധാന സവിശേഷതകൾ എന്തെല്ലാമാണെന്ന് വിശദമായി പരിശോധിക്കാം. ഈ കാറിന് പൂജ്യത്തിൽ നിന്ന് 100 കിലോ മീറ്റർ വേ​ഗത കൈവരിക്കാൻ വെറും 5.28 സെക്കന്റുകൾ മാത്രം മതിയാകും. ഒരു ഫുൾ ചാർജിൽ എസ്യു 7 668 കിലോമീറ്റർ വരെ ഓടും എന്നും ഷവോമി അവകാശപ്പെടുന്നു.

210 കിലോമീറ്ററാണ് ഈ കാറിന്റെ ഏറ്റവും ഉയർന്ന വേ​ഗത. 299 പിഎസ് പവറും 400എൻഎം ടോർക്കും ഈ കാറിന്റെ മറ്റ് സവിശേഷതകളാണ്. എസ്യു 7 മാക്സിന്റെ സവിശേഷതകൾ പരിശോധിക്കുമ്പോൾ നേരത്തെ സൂചിപ്പിച്ചത് പോലെ പൂജ്യത്തിൽ നിന്ന് 100 കിലോമീറ്റർ സ്പീഡിലെത്താൽ ഈ കാറിന് വെറും 2.78 സെക്കന്റുകൾ മാത്രം മതി. ഒറ്റ ഫുൾ ചാർജിൽ 800 കിലോമീറ്റർ വരെ ഈ കാറിന് സഞ്ചരിക്കാൻ സാധിക്കും എന്നും ഷവോമി പറയുന്നു.

265 കിലോമീറ്ററാണ് ഈ കാറിന് നേടാൻ സാധിക്കുന്ന പരമാവധി വേ​ഗത. 673 പിഎസ് പവറും 838 എൻഎം ടോർക്കും ഈ കാറിന് അവകാശപ്പെടാനുണ്ട്. ലോകത്തിലെ തന്നെ ഏറ്റവും മികച്ച വാഹന നിർമ്മാതാക്കളുടെ പട്ടികയിലെ ആദ്യ അഞ്ച് സ്ഥാനങ്ങളിൽ ഇടം പിടിയ്ക്കാനാണ് ഷവോമി ശ്രമിക്കുന്നതെന്ന് കമ്പനിയുടെ സിഇഒ ലെ ജുൻ വ്യക്തമാക്കി. അടുത്ത 20 വർഷത്തിനുള്ളിൽ തന്നെ ഷവോമി ഈ നേട്ടം സ്വന്തമാക്കുമെന്നും ഇദ്ദേഹം അവകാശപ്പെട്ടു.

ഷവോമിയുടെ സ്മാർട്ട് ഉപകരണങ്ങൾ ഈ കാറുമായി ബന്ധിപ്പിക്കാനുള്ള പ്രത്യേക സംവിധാനങ്ങളും കാറിന് നൽകിയിട്ടുണ്ട്. രണ്ട് കാറുകൾക്കും ഫാസ്റ്റ് ചാർജിങ് സാങ്കേതിക വിദ്യയാണ് ഷവോമി നൽകിയിരിക്കുന്നത്. പ്രതിവർഷം 200,000 വാഹനങ്ങൾ നിർമ്മിക്കാനുള്ള ബിജിങ്ങിലെ ഫാക്ടറിയിൽ ആണ് ഷവോമി ഈ കാറുകൾ നിർമ്മിക്കുന്നത്. അധികം വൈകാതെ തന്നെ പുതിയ കാറുകൾ റോഡുകൾ കീഴടക്കും എന്ന പ്രതീക്ഷയിലാണ് ഷവോമി.