പണം അയക്കാനും സ്വീകരിക്കാനും ട്വിറ്ററിന്റെ ടിപ്പ് ജാർ ഫീച്ചർ

ട്വിറ്റർ ടിപ്പ് ജാർ

സർവ്വീസുകൾക്ക് ടിപ്പുകൾ നൽകുന്നത് കാലങ്ങളായി ഉള്ള കാര്യമാണ്. സ്വിഗ്ഗി, സൊമാറ്റോ, ഉബർ, ഡൻസോ, തുടങ്ങിയ പ്ലാറ്റ്ഫോമുകളിലെ ഡെലിവറി എക്സിക്യൂട്ടീവുകൾക്ക് ടിപ്പുകൾ കൊടുക്കാൻ ഉപയോക്താക്കൾക്ക് അവസരം നൽകുന്ന ഒരു ടിപ്പിങ് ഫീച്ചർ കമ്പനികൾ കൊണ്ടുവന്നിരുന്നു. ഈ ഫീച്ചറിന് സമാനമാണ് ട്വിറ്ററിന്റെ ടിപ്പ് ജാർ എന്ന പുതിയ സവിശേഷത. ഇത് പുതിയ ജീവിത ശൈലികളുടെ ഭാഗമാകാൻ പോകുന്ന ഫീച്ചറായിരിക്കുമെന്ന് നിസംശയം പറയാം.

ട്വിറ്ററിലൂടെ പണം നൽകാനും സ്വീകരിക്കാനുമുള്ള ഒരു പുതിയ മാർഗമാണ് കമ്പനി അവതരിപ്പിച്ചിരിക്കുന്നത്. ഇതിന്റെ പ്രവർത്തനവും ലളിതമാണ്. ഒരു ഉപയോക്താവ് അവരുടെ പ്രൊഫൈലിൽ ടിപ്പ് ജാർ എനേബിൾ ചെയ്താൽ ഫോളോ ബട്ടണിന് തൊട്ടടുത്തായി ഒരു ഐക്കൺ കാണാൻ സാധിക്കും. ആ വ്യക്തിക്ക് ടിപ്പ് നൽകാൻ നിങ്ങൾ ആഗ്രഹിക്കുന്നുവെങ്കിൽ, ഈ ഐക്കണിൽ ക്ലിക്കുചെയ്യുക. ഇത് ആ ഉപയോക്താവ് എനേബിൾ ചെയ്ത പേയ്‌മെന്റ് സേവനങ്ങളിലേക്ക് റിഡയറക്ട് ചെയ്യും.

ട്വിറ്റർ ടിപ്പ് ജാറിലൂടെ നിങ്ങൾക്ക് ഇഷ്ടമുള്ള പേയ്‌മെന്റ് സേവനം നിങ്ങൾക്ക് തിരഞ്ഞെടുക്കാനാകും, മാത്രമല്ല പേജ് നേരിട്ട് തിരഞ്ഞെടുത്ത പേയ്‌മെന്റ് ആപ്പിലേക്കോ വെബ് പേജിലേക്കോ വീണ്ടും ലോഡുചെയ്യാനും സാധിക്കും. ടിപ്പ് ജാറിലൂടെ നിലവിൽ ബാൻഡ്‌ക്യാമ്പ്, ക്യാഷ് ആപ്പ്, പാട്രിയോൺ, പേപാൽ, വെൻമോ എന്നീ പേയ്‌മെന്റ് പ്ലാറ്റ്‌ഫോമുകളാണ് ലഭ്യമാകുന്നത്. ഐക്കണിൽ ക്ലിക്കുചെയ്ത് നിങ്ങളുടെ പ്രൊഫൈലിൽ ടിപ്പ് ജാർ ഓണാക്കാനോ ഓഫാക്കാനോ കഴിയും.

ട്വിറ്റർ ടിപ്പ് ജാർ: സുരക്ഷാ ആശങ്കകൾ

ഡിജിറ്റൽ പേയ്‌മെന്റുകളെക്കുറിച്ച് സംസാരിക്കുമ്പോഴെല്ലാ സുരക്ഷയെ സംബന്ധിക്കുന്ന ചോദ്യം ഉണ്ടാകാറുണ്ട്. ട്വിറ്ററിന്റെ ടിപ്പ് ജാർ തീർച്ചയായും ഒരു മികച്ച സംരംഭമാണ്, ഇത് ടിപ്പിങ് വഴി മറ്റുള്ളവരെ സഹായിക്കാനുള്ള ഓപ്ഷനാണ് നൽകുന്നത്. എന്നിരുന്നാലും ഇതിനകത്ത് ചില സുരക്ഷാ ആശങ്കകൾ ഉണ്ട്. പേപാൽ വഴി ടിപ്പ് ചെയ്തുകഴിഞ്ഞാൽ ഒരു വ്യക്തിയുടെ റെസിഡൻഷ്യൽ വിലാസം ട്വിറ്ററിൽ എങ്ങനെ ഓപ്പൺ ആയി കാണിക്കുമെന്നത് സംബന്ധിച്ചാണ് പ്രധാന ആശങ്ക.

നിലവിൽ ഈ പ്രശ്നം പേപാലിൽ മാത്രമാണെന്നാണ് റിപ്പോർട്ടുകൾ. ഇത് ഇന്ത്യയിൽ വ്യാപകമായി പ്രചാരത്തിലില്ല. വരും ദിവസങ്ങളിൽ ഗൂഗിൾ പേ പോലുള്ള മറ്റ് ഓപ്ഷനുകളിൽ ട്വിറ്റർ പുതിയ ഫീച്ചർ കൊണ്ടുവരും. അതിനിടയിൽ നിങ്ങൾ ട്വിറ്റർ ടിപ്പ് ജാർ ഉപയോഗിക്കാൻ പോകുകയാണെങ്കിൽ, ടിപ്പുചെയ്യുന്നതിന് മുമ്പ് നിങ്ങളുടെ സ്വകാര്യ ഡാറ്റ സുരക്ഷിതമാണെന്ന് ഉറപ്പാക്കുക.