വാട്സ്ആപ്പ് ഗ്രൂപ്പ് വീഡിയോ കോളിൽ ഇനി എട്ടുപേരെ ചേർക്കാം

വാട്സ്ആപ്പ് ഗ്രപ്പ് കോളിങ് സവിശേഷതയിൽ മാറ്റങ്ങൾ വരുത്തിയേക്കും എന്ന റിപ്പോർട്ടുകൾ വന്ന് ദിവസങ്ങൾക്കകം തന്നെ കമ്പനി ബീറ്റ പതിപ്പ് പുറത്തിറക്കിയെന്നത് അതിശയകരമാണ്. വാട്സ്ആപ്പിന്റെ ഗ്രൂപ്പ് കോളിങിൽ എട്ടുപേരെ ചേർക്കാവുന്ന സവിശേഷതയുമായി ഐഒഎസ് ആൻഡ്രോയിഡ് പ്ലാറ്റ്ഫോമുകളിൽ ബീറ്റ പതിപ്പ് പുറത്തിറങ്ങി കഴിഞ്ഞു. സ്ഥിരമായ പതിപ്പുകളിലേക്കും ഇത് വൈകാതെ ഉൾപ്പെടുത്തും.

വാട്സ്ആപ്പ് ആൻഡ്രോയിഡ് ബീറ്റ പതിപ്പ് 2.20.132, ഐഒഎസ് ബീറ്റ ആപ്പ് പതിപ്പ് 2.20.50.25 എന്നിവയിലാണ് ഗ്രൂപ്പ് കോളിങിന്റെ പുതിയ സവിശേഷത കൊണ്ടുവന്നിരിക്കു്നതെന്നാണ് റിപ്പോർട്ടുകൾ. കൂടുതൽ ആളുകളെ ഒരേ സമയം ഗ്രൂപ്പ് കോൾ ചെയ്യാൻ സാധിക്കുന്ന വിധത്തിൽ തങ്ങളുടെ ആപ്പിനെ അപ്ഡേറ്റ് ചെയ്തുകൊണ്ട് സൂം, ഗൂഗിൾ മീറ്റ് പോലുള്ള മറ്റ് വീഡിയോ കോളിംഗ് ആപ്ലിക്കേഷനുകളെ പിന്നിലാക്കാനാണ് വാട്സ്ആപ്പ് ശ്രമിക്കുന്നത്.

സൂം, ഗൂഗിൾ മീറ്റ് എന്നിവയെ നേരിടാൻ വാട്സ്ആപ്പ്

2018 അവസാനത്തോടെയാണ് വാട്സ്ആപ്പ് ഗ്രൂപ്പ് വോയ്‌സ് / വീഡിയോ കോളിംഗ് സവിശേഷത പുറത്തിറക്കിയത്. ഈ സവിശേഷതയിൽ നാല് ആളുകളെ മാത്രമേ ഒരു കോളിൽ ഉൾപ്പെടുത്താൻ സാധിച്ചിരുന്നുള്ളു. ഇന്ത്യയിലടക്കം നിരവധി രാജ്യങ്ങളിൽ ലോക്ക്ഡൌൺ പ്രഖ്യാപിച്ചിരിക്കുന്നതിനാൽ ആളുകൾ ധാരാളമായി വീഡിയോ കോളിങ് ഉപയോഗിക്കുന്നുണ്ട്. ഈ അവസരത്തിൽ സൂം, ഗൂഗിൾ മീറ്റ് പോലുള്ള ആപ്ലിക്കേഷനുകളുടെ ഉപയോഗം വൻ തോതിൽ വർദ്ധിച്ചു.

ഗ്രൂപ്പ് വീഡിയോ കോളിളോ വോയ്‌സ് കോളിളോ എട്ട്പേർക്ക് വരെ ഒരേ സമയം പങ്കെടുക്കാവുന്ന വിധത്തിലാണ് പുതിയ വാട്സ്ആപ്പ് അപ്ഡേറ്റ് പുറത്തിറക്കിയിട്ടുള്ളത്. മുകളിൽ പറഞ്ഞത് പോലെവാട്സ്ആപ്പ് ബീറ്റ പതിപ്പ് 2.20.132 ഉപയോഗിക്കുന്ന വാട്സ്ആപ്പ് ഉപയോക്താക്കൾക്ക് പുതിയ സവിശേഷത ലഭിക്കും. അതേസമയം iOS ഉപയോക്താക്കൾ ബീറ്റ പതിപ്പ്- 2.20.50.25 സ്വന്തമാക്കിയാൽ ഈ സവിശേഷത ഉപയോഗിക്കാം.

മിക്ക കമ്പനികളും വർക്ക് ഫ്രം ഹോം രീതിയിൽ ജോലി ചെയ്യുന്ന രീതിയാണ് ഇപ്പോൾ നടത്തുന്നത്. ഔദ്യോഗിക മീറ്റിങ്ങുകളും മറ്റും വീഡിയോ കോളുകൾ വഴി നടത്തുന്ന അവസരത്തിൽ കൂടുതൽ ആളുകളെ ഉൾപ്പെടുത്താൻ സാധിക്കുന്ന വീഡിയോ കോളിങ് പ്ലാറ്റ്ഫോമുകളാണ് കമ്പനികൾ തിരഞ്ഞെടുക്കുന്നത്. അതുകൊണ്ട് തന്നെ പലപ്പോഴും വാട്സ്ആപ്പ് ഇത്തരം ആവശ്യങ്ങൾക്ക് ഉപയോഗിക്കാൻ സാധിക്കുന്നില്ല.

സ്വാകാര്യ ആവശ്യത്തിനായി പോലും നാല് പേരെ മാത്രം ഉൾപ്പെടുത്താവുന്ന വീഡിയോ കോളിങ് സംവിധാനം പര്യാപ്തമല്ല. ഇത് തിരിച്ചറിഞ്ഞാണ് വാട്സ്ആപ്പ് പുതിയ അപ്ഡേറ്റ് പുറത്തിറക്കുന്നത്. അധികം വൈകാതെ തന്നെ എല്ലാ ഉപയോക്താക്കൾക്കും ഈ സവിശേഷത ലഭ്യമാകുമെന്നാണ് റിപ്പോർട്ടുകൾ. നേരത്തെ ഗ്രൂപ്പ് കോളുകൾ എളുപ്പമാക്കാൻ ഗ്രൂപ്പ് കോളിനായി പ്രത്യേക ബട്ടനും വാട്സ്ആപ്പ് നൽകിയിരുന്നു.